عمرك فكرت يعنى إيه كلمة وطن ؟؟
أنا مش جاى أتفلسف وأقول كلام كبير
أنا جى أقول كلام حسيت بيه من أول يوم صحيت فيه من النوم فى الجزاير
أنا من أكتر الناس اللى لعنوا أبو خاش البلد دي .... بجد مش طايقها .... وبيتهيألى إن كلنا كدة
لكن فى الغربة الإحساس مختلف
حد هايسألنى غربة إيه دي اللى أسبوع وللا أسبوعين ؟؟؟هارد عليه وأقول له عارف لما تصحى الصبح ماتلاقيش مامتك بتعمل لك كباية الشاى ؟؟ وتخرج من الأوضة ماتلاقيش اخواتك ؟؟ وتنزل من البيت ماتلاقيش عربيتك ؟؟ وماتقابلش رمضان البواب وماتقابلش عم سعد الحلاق اللى حاطط ماكينة تصوير عشان يحسن دخله ؟؟ ماتلاقيش سواق ميكروباص بيكسر عليك ويشتمك ؟؟عارف لما تكون بتعمل حاجات معينة وفجأة تلاقى نفسك مش بتعمل أى حاجة منها ... يعنى ماتلاقيش نفسك ... وماتلاقيش وطنك ؟؟؟
عارف يعنى إيه كلمة وطن ؟؟
وطن يعنى عمرك ... تاريخك ... اصحابك .... حياتك اللى فاتت واللى جاية
مصر مش النيل ولا الوادى ولا سينا
مصر مش الأهرامات ولا ابو الهول ولا الكرنك
مصر مش مبارك ولا السادات ولا أحمس
مصر مش عادل إمام ولا فريد شوقى ولا سعاد حسنى
مصر مش محمد منير ولا مدحت صالح ولا أم كلثوم
مصر مش الاستفتاء ولا الانتخابات ولا قانون الطوارئ
مصر مش تلات ألوان على حتة قماش ولا نسر مرمى على أرض بيضا
مصر مش بلادى بلادى ولا يا أحلى اسم فى الوجود ولا المصريين أهما
عارفين ليه ؟؟؟؟
لأن كل دي حاجات كان ممكن ماتبقاش موجودة ... ولأنى لو كنت هندي كنت هاحس بنفس الحنين للهند
مصر بالنسبة لى هى أنا ... وبالنسبة لك هى إنت ... وبالنسبة له هى هو
الشعور بالغربة يعني الشعور باليتم
الغربة إنك تبقى عايز تعيط
الغربة إنك تركب طيارة بتجري بيك من نفسك بسرعة 900 كيلو فى الساعة
إنك تشوف بلدك عمالة تصغر تحتك وإنت عمال تطلع فوق
إن اصحابك يودعوك على باب المطار
إنك تسلم على آخر جزء بيربطك بتاريخ ممتد من ساعة ماخرجت من وطنك الصغير فى بطن أمك لوطنك الكبير
إنك تبقى عارف إنك لما تنزل تركب ميكروباص نص ساعة مش هاتوصل للكافيه اللى اتعودت تقعد فيه
انك ماتلاقيش حد فى الشارع بيقول لك إنت بتزاولنى وللا إيه يا برنس
الغربة إنك تلاقى نفسك - فجأة - فى حتة تانية
إنك وانت مش فى بلدك تقول عليها " هنا " وتقول على الحتة اللى انت فيها " هناك "
عارف لما تفتح التلفزيون وتلاقى عصام كاريكا بيغنى وتلاقى نفسك قاعد مشدود ومتابع كأنك بتسمع قارئة الفنجان ؟؟
لما يبقى نفسك فى طبق كشرى بالدقة ؟؟
لما تبقى الحاجات اللى كنت بتقرف منها فى بلدك مجرد حلم نفسه يتحقق وعارف إنه مش هايتحقق ؟؟
لما تدخل على جوجل وتكتب مصر وتتنشق على أخبارها ؟؟
ساعات باسأل نفسى .... هو ليه الإنسان بيحب بلده ؟؟
تعود ؟؟
سفسطة ؟؟
رغبة فى الانتماء لأى كيان ؟؟
ولحد دلوقتى مالقيتش الاجابة
هو القط مابيحبش الا خناقه فعلا ؟؟
صعب قوى إن كل علاقتك بوطنك تبقى قناة فضائية أو صفحة على النت أو أغنية فى كاسيت
صعب إنك تتخيل نفسك عايش جوة قناة فضائية أو صفحة على النت أو كاسيت
عمرك سألت نفسك ليه الطيارة اللى واخداك ومسافرة بتمشى بسرعة واللى مرجعاك بتمشى على مهلها ؟؟
ليه وانت فى بلدك بتسهر لحد الساعة 3 الصبح وتقوم الساعة 6 فايق .. وفى الغربة مهما تنام بتحس انك لسة عايز تنام ؟؟
عارف ليه دعوة المسافر مستجابة زي دعوة المظلوم ؟؟
عشان الاتنين بيبقوا لوحدهم قوي
عارف صعوبة إنك تبقى لوحدك رغم انك وسط 30 مليون إنسان ؟؟؟
عارف صعوبة إنك تقف قدام المراية تشوف حد تانى ومكان تانى ؟؟
عارف .....
مصر وحشتنى .....
قوى
ليست هناك تعليقات:
إرسال تعليق