مين هيعمل لي بلوك ؟

ها ... كام واحد ماتوا لحد دلوقتى من 25 يناير 2011 ؟؟؟؟ كام واحد أخدوا صك الشهادة .. كأن الشهادة دي بنوزعها من جيوبنا ؟؟؟ أنا لا أعترف بأن أى حد من اللى ماتوا سواء فى التحرير أو ماسبيرو أو مجلس الوزرا شهداء .. لأننى ببساطة مادخلتش فى علم الغيب .. وربنا سبحانه وتعالى هو الوحيد اللى يعرف نية كل واحد من اللى ماتوا دول كانت إيه ؟؟ فيه ناس شهداء فعلا كانوا نازلين دفاعا عن الحريات .. وعشان خاطر الوطن .. وعشان كل الحاجات اللطيفة دي .. انما برضه فيه ناس من اللى ماتوا كانوا نازلين يتحرشوا بالبنات ويبيعوا مخدرات .... فمحدش يقدر يقول ان اللى ماتوا دول شهدا أو مش شهدا .. ربنا بس هو اللى عالم باللى فى القلوب .... مشكلتنا من بداية الثورة إن كل واحد مغمض عينه وماشي فى اتجاه واحد .. اللى ماشي فى اتجاه الثوار رافض يشوف أخطاءهم .. ورافض يشوف تجاوزاتهم ... رافض يعترف انهم شالوا سلاح وهاجموا مصالح ووقفوا شوارع وعطلوا حياة ناس وقطعوا عيشهم واللي ماشي فى اتجاه المجلس العسكري رافض يشوف ان المجلس العسكري بيلعب بالبلد وبيقتل الثوار وبيحرق ويخرب وأى حد يجرؤ يقول ان الثوار غلطانين فى أى حاجة بيتضرب ميت جزمة ويتعمل له بلوك وديليت ويتشتم ويتهزق .. وأنا بصراحة عايز اتشتم :) السؤال بقى ... هو مش ثوار التحرير هم اللى هللوا للجيش ومشيوا فى الشوارع بيصرخوا الشعب والجيش ايد واحدة ؟؟؟ مش الثوار دول هم اللى اختاروا عصام شرف وعملوله مظاهرات حب وعشق وقالوا ان هو اللى هيجيب الديب من ديله مع إنه أصلا حزب وطني ؟؟ وفى الحالتين طلعوا بيفتوا من غير ما يبقوا عارفين أى حاجة ؟؟؟ هم مش الثوار دول هم اللى قالوا لا ادوا الاخوان حريتهم وسيبوهم ينزلوا الانتخابات وادوهم أصواتهم ؟؟ دة معناه ببساطة إن مش كل واحد خرج فى ثورة واعتصم فى التحرير يقدر يختار صح .... فطالما الثورة مالهاش قائد يبقى هنفضل نتخبط والمجلس يعمل اللى هو عايزه واحنا زي المعيز هنحقق له اللى هو عايزه المجلس قادر يلبسنا كلنا الغلط زي ما هو عايز .. لما المجلس قال الجنزوري هو رئيس الوزرا .. وقبل حتى اعلان التشكيل الوزاري .. الناس راحوا قدام مجلس الوزرا واعتصم وحلف تلاتين يمين طلاق ان الجنزوري مش هيدخل مكتبه ولا هيشتغل منه .. قلة أدب ؟؟ آه قلة أدب وبعدين حصلت موقعة الحواوشي .. والناس كلت الحواوشي المسموم ... كل الناس قالت المجلس العسكري حط للمتظاهرين سم فى الحواوشي .. ومحدش فتح بقه لما طلع المجلس العسكري برئ من التهمة دي .. عارفين ليه ؟ عشان كل واحد بيبص للى هو عايز يشوفه وبس لما المستشفى تقول ان فيه خمسين مصاب من المتظاهرين الثوار كلهم بيقولوا شوفوا .. ادي الحقيقة .. والمجلس العسكري ولا كأنه سمع حاجة .. ولما نفس المستشفى فى نفس الموقف تقول ان فيه خمسين مصاب من الجيش المجلس العسكري بيقول شوفوا .. ادي الحقيقة .. والثوار ولا كأنهم سمعوا حاجة مشينا زي الغنم ورا الإخوان واخترناهم .. ولبسنا الخازوق المعتبر .... وبعدين لسة فيه ناس ماشية ورا حازم أبو اسماعيل .. ورفضوا يسمعوا أى حاجة عكس رأيهم ... القاضي قال ان امه مصرية قالوا القضاء النزيه .. القاضي قال لا امه امريكية قالوا قضاء وسخ ... ابو اسماعيل سخنهم عشان ينزلوا العباسية نزلوا .. ولما خلع منهم وقال مليش دعوة بيهم قالوا لا ماقالش .. ماقالش ايه يا شوية غنم ؟؟؟ أصلا فكرة نزول العباسية دي فكرة لو المجلس العسكري قعد يفكر عشر سنين ازاي يأجل الانتخابات مش هيجيب فكرة أحسن من دي .. ناس تقرب من وزارة الدفاع اللى بتتحكم منها البلد ... فيهم ناس مسلحين ؟ أيوة فيهم ناس مسلحين .. ورايات سودا .. وحي على الجهاد .. فكان طبيعي ان الجيش يرد بكل قوة .. لأن اقتحام وزارة الدفاع غير اقتحام وزارة الداخلية ... وطبيعي ان الناس تقلب على الثوار .. وطبيعي ان اهالي المكان هناك يرفضوا وجود الثوار ويطردوهم ويطاردوهم .. ببساطة لأن الثوار اتصرفوا هناك بمنتهى الغباء .. ومرة تانية بقول : رد فعل الجيش واستخدامه للقوة المفرطة ضدهم كان طبيعي تماما ومتوقع .. وكل اللى حصل هو الكثير من الموت المجاني .. وفى الاخر حازم ابو اسماعيل اللى سخن اتباعه وقادوا الزبالة اللى هناك دي كلها اختفى وقال لك رجلي واجعاني ونوارة قالت : وزارة الدفاع معمولة بفلوسنا ومن حقنا نتظاهر هناك ونعمل اللى على كيفنا .. ما شاء الله عليها ... دة معناه ان اى مواطن فى اى حتة فى العالم من حقه يعمل اللى هو عايزه فى اى مكان عام باعتبار انها فلوسه .. انما عموما مش متوقع اكتر من كدة من تربية الحشاش .. شكل الصنف كان عالي قوي للمجلس خطايا .. وللثوار خطايا .... وفى العباسية اكبر خطيئة للثوار هي انهم ادوا المجلس العسكري ذريعة إنه يعمل اللى هو عايزه .. فرض حظر التجوال .. ولو عايز يأجل الانتخابات محدش هيقدر يرفع صباعه فى وشه .. خصوصا مع تأكيداتهم المتتالية على تسليم السلطة فى معادها .. بس المتظاهرين دول كأنهم بيتلككوا على تأجيل تسليم السلطة ملحوظة أخيرة : المتظاهرين فيهم ناس شرفاء وناس مأجورين وناس متدينة وناس بتشرب حشيش ومخدرات فى الاعتصامات وفيهم ناس سلميين وناس مسلحين وناس نازلين عشان حريتهم وناس نازلين عشان يسخنوا الدنيا ويولعوها وكلهم خلطبيطة فى بعض ملحوظة تانية : الضرب والكر والفر والاعتصامات خصوصا فيما بعد التحرير خلى الناس فعلا تكره الثورة لأنه وقف حال ناس كتير من الأرزقية ... الناس دي ميفرقش معاها مين اللى يحكم .. الناس دي عايزة تشتغل عشان بيجيبوا أكل ولادهم يوم بيوم ملحوظة تالتة ... المظاهرات والاعتصامات مالهاش علاقة بإن الناس توقف الطريق وتتخانق وتضرب أى سواق تاكسي يحاول يعدي ... انزلوا الشارع كدة وشوفوا مين دلوقتى مع الثورة .. كام فى المية من الشعب مع الثورة .. مقابل كام فى المية كان مع الثورة السنة اللي فاتت فى عز الانفلات الأمني .. هتلاقوا ان تأييد الثورة فى الشارع قل قوي .. ومع الأسف أحمد شفيق وعمرو موسى فرصتهم فى الفوز بالانتخابات كبيرة قوي .. مش بالتزوير والتدليس بقدر ما هي بتصرفات الثوار اللى خلت الناس فعلا تكره الثورة ياللا .. اعملولى بلوك وديليت بقى